– ءبىزدىڭ مەكەمە كوممۋنالدىق قىزمەت كورسەتۋمەن قاتار, جول قۇرىلىسىمەن دە اينالىسادى. بىلتىر ءبىراز شارۋانى اياقتاي المادىق, بيىل سونىڭ ەسەسىن قايتارۋ ءۇشىن اسفال-بەتون زاۋىتىن سالۋدى قولعا الدىق. اۋدانىمىز جاڭادان دامىپ كەلە جاتقاندىقتان, مۇنداعى جول ماسەلەسىن بىرجاقتى شەشىپ الۋىمىز قاجەت. اسفالت-بەتون زاۋىتىن شىڭعىستايدىڭ ماڭىندا سالىپ جاتىرمىز. ويتكەنى, بۇل اۋىل اۋداننىڭ ءدال ورتاسىندا تۇر ەكەن. زاۋىت سالىناتىن جەر تەلىمىن اۋكتسيون ارقىلى ساتىپ الىپ, وزىمىزگە راسىمدەدىك. ەلەكتر جەلىلەرىن تارتۋ ءۇشىن تەحنيكالىق رۇقساتىن الدىق, وندىرىسكە قاجەتتى ماتەريالداردى تاسىمالداپ وتىرۋ ءۇشىن بەلگىلەنگەن كارەردىڭ جەرىن راسىمدەدىك, – دەيدى ايدوس بايعونىسوۆ.
اسفالت زاۋىتىنىڭ اۋماعى ەكى گەكتار جەردى الىپ جاتىر. مەردىگەردىڭ ايتۋىنشا, زاۋىتتىڭ قاجەتتى ماتەريالدارى مەن قۇرىلعىلارى قىتايدان جەتكىزىلگەن. قۇرىلىسقا بۇگىندە 280 ملن تەڭگەگە جۋىق قاراجات جۇمسالعان. ا.بايعونىسوۆتىڭ ايتۋىنشا, زاۋىتتىڭ قۇرىلىسى اياقتالعانشا ءالى دە ءبىرشاما قارجى قاجەت.
– زاۋىت قۇرىلىسىندا 10-15 ادام جۇمىس ىستەپ جاتىر. جاڭا ۇلگى, كاتونقاراعاي, شىڭعىستاي, ورەلدىڭ تۇرعىندارىن جۇمىسقا الدىق. جالاقىلارى كەلىسىم بويىنشا تولەنەدى, – دەيدى كومپانيا باسشىسى.
قۇرىلىس الاڭىنداعى جۇمىسقا ەكسكاۆاتور, جۇك تيەگىش, كران, 2 جۇك تاسىمالداۋشى تەحنيكالارى جۇمىلدىرىلعان. قازىرگى كەزدە قۇرىلىستىڭ 80 پايىزى اياقتالدى.
زاۋىت ىسكە قوسىلعاندا مۇندا ساعاتىنا 60-80 تونناعا دەيىن اسفالت وندىرىلەدى. ماتەريالدار قىتايدان الىنعاندىقتان, ولار بىزگە ءۇش ماۋسىمعا دەيىن كەپىلدىك بەرىپ وتىر. زاۋىتتى تۇرعىزعان سوڭ وسىندا ارنايى قىتايلىق مامان كەلىپ, جۇمىستىڭ قىر-سىرى تۋرالى تولىقتاي كومەك بەرەدى.
زاۋىت قۇرىلىسى اياقتالىسىمەن, مۇندا جۇمىسقا تۇراقتى تۇردە 10 ادام قابىلدانادى. ولارمەن ارنايى كەلىسىمشارت جاسالادى.
شىعىس قازاقستان وبلىسى
